Thaçi nuk e përfundon marshimin e LGBTI-së

Presidenti i Kosovës, Hashim Thaçi i është bashkangjitur marshimit kundër homofobisë dhe transfobisë që ka nisur deri nga Sheshi “Skënderbeu” por me të arritur në Sheshin “Zahir Pajaziti” ai e ka lënë marshimin, duke u bërë pjesë e masës të grumbulluar tek amfiteatri.

Presidenti Hashim Thaçi me të arritur tek Sheshi “Zahir Pajaziti” ka braktisur marshimin duke mos u dëgjuar fjalimet e drejtuesit e tri organizatave Qendra për Barazi dhe Liri (CEL), Qendra për Zhvillimin e Grupeve Shoqërore (CSGD) dhe Qendra për Emancipim Shoqëror (QESh) .

Thaçi me ekipin e vet në të cilin kanë qenë më shumë roje ka qenë pjesë e marshit për herë të parë, e bashkë me të ka qenë edhe paraardhësja e tij, Atifete Jahjaga e cila ka përfunduar marshin duke marrë pjesë edhe në organizimin tek Sheshi “Zahir Pajaziti”.

Organizatorët kanë thënë se ky “marshim nuk është vetëm për ata që sot kanë mundësinë të shprehin haptas vetën e tyre por për ata që nuk kanë mundësi të jenë në këtë marsh pasi janë të rrethuar me homofobi”.