![SBASHK uron nxënësit me rastin e fillimit të vitit të ri shkollor](https://insajderi.com/wp-content/uploads/2018/12/mesimi-730x440.jpg)
Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, ka përgëzuar nxënësot dhe mësimdhënësit me rastin e fillimit të vitit të ri shkollor, i cili ka filluar nga sot, më 14 shtator, njofton Insajderi.
Për shkak të pandemisë COVID-19 mësimi do të mbahet në kushte të vështira, ndërkaq Jasharaj ka bërë të ditur se në të gjitha komunat e Kosovës ka nisur viti i ri shkollor, sipas rekomandimeve të institucioneve shëndetësore për parandalimin e përhapjes së kësaj pandemie, si pasojë e së cilës deri më sot kanë vdekur 600 persona.
“Ju kolegë të nderuar do të zhvilloni betejën në rrugëtimin drejt njohurive të reja për nxënësit e Kosovës, por edhe betejën për ta ruajtur shëndetin personal, shëndetin e kolegëve dhe të fëmijëve, që janë stolia më e bukur e atdheut tonë. Edhe në të kaluarën i kemi mposhtur vështirësitë dhe kemi ngadhënjyer duke e ruajtur arsimin. Bashkë do të angazhohemi edhe tani dhe do t’i tejkalojmë vështirësitë në shërbim të edukimit e arsimimit të brezave. Kolegë të nderuar, punëtorë të arsimit, na qoftë i mbarë ky vit i ri shkollor. Ju premtojmë se SBASHK-u në bashkëpunim me MASH do të angazhohet edhe për realizimin e kërkesave të drejta e legjitime të punëtorëve të arsimit”, ka thënë Jasharaj.
Ndryshe, si pasojë e shpërthimit të koronavirusit në muajin mars, procesi mësimor ishte zhvilluar online. /Insajderi.com