Shërbimi Spitalor dhe Klinik Universitar i Kosovës ka dënuar sulmin ndaj punonjësve shëndetësorë.
Të shtunën është raportuar se një mjek me iniciale V.K dhe një infermiere A.L janë sulmuar teksa po kryenin shërbime shëndetësore për pacientët në Klinikën Infektive.
“Aktet e tilla të ushtrimit të dhunës ndaj punëtorëve shëndetësorë në detyrë në institucionet shëndetësore, janë të pa pranueshme, të dënueshme dhe të dëmshme, ato e dëmtojnë rëndë imazhin dhe dinjitetin e mjekut dhe infermierit, por e dëmtojnë edhe ofrimin e shërbimeve shëndetësore cilësore për gjithë qytetarët e Kosovës”, thuhet ndër tjerash në reagim.
Gazeta Online Insajderi kishte raportuar mbi fenomenin e dhunës ndaj punëtorëve shëndetësorë. /Insajderi.com
Reagimi i plotë i ShSKUK-së:
ShSKUK dënon dhunën ndaj mjekut dhe infermieres
Shërbimi Spitalor dhe Klinik Universitar i Kosovës (SHSKUK), njofton se të premten, në vendin e tyre të punës janë sulmuar, mjeku V.K(anesteziolog-intensivist) dhe infermieria A.I, derisa po ofronin shërbime shëndetësore për pacientët në Klinikën Infektive të Qendrës Klinike Universitare të Kosovës.
SHSKUK dënon aktin qyqar të sulmin ndaj mjekut dhe infermieres në detyrë, gjatë dhënies së ndihmës shëndetësore.
Aktet e tilla të ushtrimit të dhunës ndaj punëtorëve shëndetësorë në detyrë në institucionet shëndetësore, janë të pa pranueshme, të dënueshme dhe të dëmshme, ato e dëmtojnë rëndë imazhin dhe dinjitetin e mjekut dhe infermierit, por e dëmtojnë edhe ofrimin e shërbimeve shëndetësore cilësore për gjithë qytetarët e Kosovës.
SHSKUK kërkon nga organet e drejtësisë të merren me rastin me në fjalë dhe ndaj sulmuesit të ndërmerren masa konform legjislacionit në fuqi. /Insajderi.com
