Një apartament prej 67 metrave katror në vlerë prej 400 mijë eurove dhe në pronësi të bashkëshortes së tij, e ka deklaruar kryetari i Lëvizjes Vetëvendosje, Albin Kurti.
Në deklarimin e pasurisë për vitin 2019, Kurti nuk ka deklaruar asnjë pronë të paluajtshme në pronësi të veten, por ka deklaruar një banesë në pronësi të bashkëshortes së tij, Rita K. Augestad-
Në deklarimin e pasurisë nuk është specifikuar nëse bëhet fjalë për apartament në Norvegji – prej nga vjen bashkëshortja e Kurtit – apo në Kosovë.
Banesën prej 67 metrave katror, Kurti e ka deklaruar në vlerë prej 400 mijë eurove. Ka thënë se është blerë në vitin 2018 nga bashkëshortja, ndihmuar edhe përmes një kredie të marrë nga ajo, raporton Insajderi.
Bashkëshortja e Kurtit ka marrë kredi në vlerë prej 270 mijë euro, të cilën obligohet ta kthejë në 25 vitet e ardhshme.
Në pronësi personale, kryetari i VV-së nuk ka deklaruar pasuri të luajtshme, e as të paluajtshme. Nuk ka deklaruar as veturë. /Insajderi.com
