Shoqata e Gastronomeve të Kosovës i ka bërë thirrje gastronomeve e punëtorëve që më 25 shtator nga ora 14:00 – 15:00, të mbyllin bizneset e tyre dhe të dalin para Qeverisë e Kuvendit të Kosovës për të dorëzuar kuponat fiskal, njofton Insajderi.
Nëpërmjet një statusi në faqen zyrtare në Facebook, ata kanë thënë se po u cenohet e drejta e biznesit në Kosovë, ndërsa kanë përmendur kërkesën për zgjatje të orarit të punës, pas kufizimit të qarkullimit për shkak të pandemisë.
“Thirrjet tona për kryeministrin, Qeverinë e Parlamentin po duket të jenë të kota”, thuhet në njoftim e tyre.
Shoqata paralajmëron se nuk do të kenë mirëkuptim këtë herë, ndryshe nga ajo e kaluara kur u protestua për vetëm pak minuta.
“Neve nuk na ka mbetur asnjë alternativë tjetër, sepse po na e cenoni ekzistencën, më keq se kaq nuk ka”, janë shprehur ata./Insajderi.com
