Zëdhënësi i Partisë Demokratike të Kosovës, Avni Bytyçi, ka reaguar ndaj liderit të Lëvizjes Vetëvendosje, Albin Kurti, meqë ky i fundit tha se Gjykata Speciale është krijuar nga PDK dhe LDK, njofton Insajderi.
Përmes një postimi në Facebook, Bytyçi tha se Specialja nuk është themeluar nga PDK-ja, por ishte iniciativë e një ish-zyrtari të shërbimit rus në Këshillin e Evropës, me ndihmën e Dick Martit edhe të Karla Del Pontes, duke u mbështetur në dëshmi të fabrikuar nga Serbia.
“Ju jeni thjeshtë një sharlatan e një demagog që për hir të përfitimeve politike paturpësisht e sulmon edhe UÇK-në edhe luftën e saj në këtë kohë”, ka thënë tutje ai.
Postimi i plotë:
Jo z.Kurti, Gjykatën Speciale nuk e themeloi PDK-ja. Ajo ishte iniciativë e një ish zyrtari të shërbimit rus në Këshillin e Evropës, me ndihmën e Dick Martit edhe te Karla Del Pontes, duke u mbështetur në dëshmi të fabrikuar nga Serbia, edhe të disa ndërkombëtarëve të komprometuar dhe “dëshmive” e deklaratave të llojit të disave që flasin shqip, e që thonin se UÇK-ja kishte kryer krime.
Në rastin tënd, ju në kohën sa ishit Kryeministër edhe këshilltari juaj, Shkëlzen Gashi, publikisht keni thënë se UÇK-ja kishte kryer krime.
PDK e votoi Gjykatën sepse i kishin dy mundësi, o ta bënim vet, o Këshilli i Sigurimit të Kombeve të Bashkuara ta themelojë me një rezolutë, veprim ky që do ta kishte dëmtuar imazhin e drejtë të luftës sonë çlirimtare.
Nuk kam dyshim duke u bazuar në deklaratat që i keni thënë se për ju ka qenë më mirë një tribunal ndërkombëtar kundër UÇK-së e luftës së saj dhe popullit të Kosovës se sa vetë një gjykatë brenda sistemit tonë juridik që i heton pretendimet e Serbisë edhe të juajat se UÇK ka kryer krime.
Sa ishit Kryeministër, nuk i mbrojtët ushtarët e lirisë siç pate thënë në Kuvend, besa as Rexhep Selimin që e morrën edhe e intervistuan. Siç duket edhe në opozitë zëri për UÇK-në disi ju ka humbur.
Ju jeni thjeshtë një sharlatan e një demagog që për hir të përfitimeve politike paturpësisht e sulmon edhe UÇK-në edhe luftën e saj në këtë kohë.
Sharlatan të tillë, historia i harron shpejtë, për këtë arsye edhe ky komb nuk do t’ju mbajë në mend për diçka, perpos për urrejtjen që keni ndaj çdo gjëje dhe çdo njeriu që nuk mendon e vepron si ju.
Edhe mos u shqetëso z. Kurti, se dhe këtë betejë do ta fitojmë, sepse drejtësia është në anën tonë, kuptohet, pa ju si gjithnjë! /Insajderi.com
