Një faqe në internet, e cila operon në gjuhen turke, ka shkruar se kriminel serb, për të cilin dihet zyrtarisht se ka vdekur në vitin 2000, është gjallë dhe po lufton në Nagorno-Karabakh. Është prezantuar edhe një foto e pretenduar e Arkanit, në të cilën ai shihet i plakur. Postimi është larguar pas një ore. Mediat serbe lajmin e kanë quajtur të pavërtetë.
Një faqe në gjuhen turke në Twitter ka postuar një foto, në të cilën pretendohet se është krimineli serb, Zheljko Raznatoviq, i njohur me nofkën “Arkan”.
Aty thuhet se ai po merr pjesë në luftimet në mes të Armenisë dhe Azerbajxhanit për enklavën e Nagorno-Karabakh.
Sipas faqes Derindusunce.org, Arkan – që zyrtarisht dihet se ka vdekur në një atentat që iu bë afër një hoteli në Beograd me 15 janar të viti 2000 – po lufton si mercenar, shkruan Insajderi.
Postimi për kriminelin serb që njihet për krimet në luftërat e Ballkanit, u larguar një orë pasi u postua.
Mediat serbe e kanë komentuar lajmin për Arkanin si një lajm të rremë.
Arkan ishte komandant i ushtrisë paramilitare serbe dhe shefi i Gardës Vullnetare Serbe gjatë luftërave në Jugosllavi.
Ai ishte në listën e Interpolit si një nga njerëzit më të kërkuar në Evropë për hajni, vrasje dhe krime të tjera.
Ai më vonë ishte akuzuar nga Tribunali Ndërkombëtar për Krime për ish-Jugosllavinë, nën akuza për krime kundër njerëzimit.
Deri në vdekjen e tij, ai njihej si figura më e fuqishme e krimit të organizuar në Ballkan.
Në janar të vitit 2000 ai u sulmua në Beograd ku ishte plagosur dhe më pas vdiq nga plagët, para se të fillonte procesi gjyqësor kundrejt tij./Insajderi.com
