Ndërtesa e Agjencisë së Regjistrimit Civil në Prishtinë është përfshirë nga zjarri gjatë mëngjesit të sotëm, njofton Insajderi.
Nga ky incident i ndodhur sot nuk raportohet për persona të lënduar, ndërkaq zjarrfikësit dhe policia kanë dalë në vendin e ngjarjes.
Kështu ka bërë të ditur për Gazetën Online Insajderi, zëdhënësja e policisë për rajonin e Prishtinës, Flora Ahmeti.
Se si është shkaktuar ky zjarr ende nuk dihet, por që është raportuar se po digjen serverët.
“Rreth orës 10:30 e kemi pranuar informatën për një incident zjarri në ndërtesën e Agjencisë së Regjistrimit Civil në rrugën ‘Luan Haradinaj’ në Prishtinë. Nuk raportohet për persona të lënduar. Zjarrfikësit dhe policia menjëherë kanë dalë në vendin e ngjarjes. Zjarri është lokalizuar. Për detaje rreth rastit do të njoftoheni pasi që nga njësitet kompetente të përfundojnë ekzaminimet e vendit të ngjarjes”, ka njoftuar Ahmeti. /Insajderi.com
