Agjencia Kundër Korrupsion e ka mbyllur rastin kundër zv/kryeministrit të Kosovës, Ramiz Kelmendi rreth konfliktit të interesit për grantin e fituar nga Ministria e Bujqësisë në vlerë prej 150 mijë eurosh. Sipas AKK-së, kompania e tij ‘Elkos’ ka konfirmuar se ato mjete ia ka kthyer buxhetit të Ministrisë, duke shmangur kështu konfliktin e interesit.
Në janar të këtij viti Insajderi kishte shkruar se si kompania ‘Elkos’, pronë e zv/kryeministrit të Kosovës, Ramiz Kelmendi, kishte fituar grant nga Ministria e Bujqësisë në vlerë prej 150 mijë eurosh për blerjen e pajisjeve të reja për përpunimin e mishit.
Agjencioni Kundër Korrupsion e kishte trajtuar rastin në fjalë dhe kishte ardhur në përfundim se zv/kryeministri Kelmendi e ka shmangur konfliktin e interesit, pasi kompania ‘Elkos’ i kishte kthyer mjetet e përfituara nga granti i Ministrisë.
Me këtë veprim, AKK thotë se e ka mbyllur rastin ndaj zv/kryeministrit Kelmendi.
“Mbyllet rasti për Ramiz Kelmendin, Zëvendëskryeministër në Qeverinë e Kosovës, për shkak se zyrtari i lartë publik ka shmangur gjendjen e konfliktit të interesit në të cilin ndodhej”, thuhet në arsyetimin e AKK.
“Të informona se nuk po e di”, kishte thënë ai.
Dy orë pas publikimit të lajmit, Kelmendi kishte thënë se do urdhërojë anulimin e këtij granti.
I pyetur sesi e komenton faktin se kompania e tij që gjeneron miliona euro të hyra aplikon për grante qeveritare, Kelmendi kishte thënë se pikërisht kjo është arsyeja perse ai nuk do të pranojë kurrfarë fondi nga Qeveria.
“E ndajë mendimin se nuk kemi nevojë për të hyra nga shteti. Unë nuk i marrë as shpenzimet e as rrogën në Qeveri, e po lejoj marrje granti”, kishte shtuar më tej ai.
Në garë ishin shtatë kompani kosovare që së bashku kishin përfituar mbi 1 milionë euro grande nga Ministria e Bujqësisë dhe Bujqësisë për zhvillim të projekteve të ndryshme.
Biznesmeni pejan, u emërua zv/kryeministër i Qeverisë së Kosovës, pasi nga PDK-ja kishte kaluar në LDK./Insajderi.com
