Presidenti i Serbisë, Aleksandar Vuçiq, ka reaguar për zgjedhjet e djeshme parlamentare në Kosovë, për të cilat e ka përgëzuar Listën Serbe për fitimin e shumicës së votave të serbëve në zgjedhjet e përgjithshme në Kosovë, transmeton Insajderi.
Vuçiq deklaroi se fitorja e Listës Serbe është e rëndësishme pasi tha se “po përballemi me një periudhë të vështirë”.
“Unë i përgëzoj njerëzit tanë. Kjo është një gjë e rëndësishme, sepse po përballemi me një periudhë të vështirë”, tha Vuçiq për televizionin serb “TV Pink”.
I pari i Serbisë komentoi mbi faktin se Lista Serbe fitoi mbi 99% të votave në Mitrovicën e Veriut, duke ironizuar me kundërshtaren e tyre, Rada Trajkoviq.
“Si ndodhi që Rada Trajkoviq nuk mori asgjë? Duket se njerëzit e dinë kush po bën për njerëzit tanë atje dhe kush po mundohet vetëm për interes të tyre”, tha Vuçiq.
Nga 99.25% të votave të numëruara, Lista Serbe i ka marrë 5,56% të tyre, apo 43 mijë e 746 vota. /Insajderi.com
