Drejtori i Shërbimit Spitalor Klinik Universitar i Kosovës, Valbon Krasniqi, ka thënë se tubimet e partive politike para dhe gjatë fushatës zgjedhore paraqesin rrezik për përhapjen e Coronavirusit.
Sa i përket variantit të ri të COVID-19, Krasniqi tha se tashmë në Kosovë janë vetëm tri raste të konfirmuara.
“Zyrtarisht deri tani kemi tri raste të variantit të ri në Kosovë, nga 30 mostra që janë dërguar më herët në Gjermani, ndërkohë që rastet e tjera të konfirmuara me variantit të ri të COVID-19 nuk kemi. Në përgjithësi viruset si COVID-19, njihen për ndryshimet që mund të pësojnë gjatë kalimit nga njerëzit te njerëzit dhe në përgjithësi në shumicën e rasteve këta virus mund edhe të dobësohen dhe të humbin virulencën (aftësia e virusit për të shkaktuar sëmundje). Është herët të thuhet nëse ka ndodhë një gjë e tillë, por këtyre ditëve ne nuk kemi parë ashpërsim të sëmundjes në raport me muajt paraprak”, ka thënë Krasniqi në një intervistë për Telegrafin.
Krasniqi foli edhe për masat antiCOVID, duke shtuar se duhet të vazhdohet më vëmendje pasi që virusi është aktiv.
“Kosova ka kohë që është në mesin e vendeve me masat më të lira, në fakt pothuajse jemi duke jetuar sikurse të kemi një situatë normale, sidoqoftë ne duhet ta bëjmë thirrje që të kemi vëmendje kolektive dhe individuale për respektim të masave antiCOVID, ne ende e kemi prezent virusin në Kosovë, ende është virusi edhe në shtetet përreth dhe në Evropë është duke bërë dëme të mëdha. Prandaj, duhet të jemi të kujdesshëm dhe në asnjë moment të mos e shpërqendrojmë vëmendjen nga masat antiCOVID. Tani për tani përgjegjësia individuale duhet të jetë e lartë dhe po ashtu përgjegjësia kolektive”, potencoi ai.
Ndërkaq, për vaksinat antiCOVID, Krasniqi tha se nuk mund të japë ndonjë datë të saktë se kur do të arrijnë në Kosovë dhe se më këtë çështje merret Ministria e Shëndetësisë./Insajderi.com
