Komiteti për Punë të Jashtme i Parlamentit Evropian, derisa pritet të votojnë Raportin për Kosovën, kanë diskutuar për shuarjen e Task-Forcës anti-korrupsion gjë që është parë si shqetësuese në PE, njofton Insajderi.
Në draft-raportin për Kosovën të këtij Parlamenti është hasur në shumë ngecje në luftën kundër korrupsionit në vend.
Lufta kundër korrupsionit është vënë më së shumti re në këtë raport, ndërsa theksohet shqetësimi i madh i PE-së për shuarjen e Task-Forcës brenda Policisë së Kosovës për luftën kundër korrupsionit.
Në tetor të vitit 2020, Task-Forca edhe pse ishte një nga hallkat kryesore që për një dekadë u mor me hetim të korrupsionit të profilit të lartë, me vendim të Qeverisë Hoti, u shua.
Arsyetimi i kryeministrit Avdullah Hoti ishte që me shfuqizimin e këtij vendimi “do të bëhej ndarja e pushteteve”.
Teksa është mirëpritur përkushtimi i Kosovës në avancimin drejt Evropës në këtë raport Kosova kritikohet për progresin e paktë në implementimin e Agjendës për Reforma Evropiane.
Janë shprehur shqetësime edhe për shuarjen e Ministrisë për Integrim dhe është kërkuar nga Qeveria e Kosovës që të sigurohet se strukturimi i ri garanton kompetencë e përgjegjësi në kuadër të koordinimit të procesit të integrimit.
Për sistemin e drejtësisë është kërkuar të ketë më shumë pavarësi e të ndalet ndërhyrja në rastet e profilit të lartë. Është kërkuar luftë më e madhe në konfiskimin e pasurisë së fituar jashtëligjshëm.
Mungesa e shpeshtë e kuorumit në Kuvendin e Kosovës ka qenë kritika tjetër në këtë raport.
Shqetësim tjetër është cekur edhe ndotja e madhe e ajrit.
Në Raportin për Kosovën është përshëndetur heqja e tarifës ndaj mallrave serbe dhe atyre që vijnë nga Bosnja e Hercegovina, ndërsa është vlerësuar edhe Marrëveshja për normalizim ekonomik mes Kosovës dhe Serbisë e nënshkruar më shtator në Ëashington.
Një tjetër çështje e rëndësishme që u theksua në këtë mbledhje është mungesa e liberalizimit të vizave edhe pse kushtet janë përmbushur.
PE-ja ka përsëritur se dialogu me Serbinë është prioritet dhe parakusht për pranim në Bashkimin Evropian. Është kërkuar angazhim konstruktiv në dialog në kërkim të një marrëveshjeje ligjërisht obliguese.
Është kërkuar më shumë punë lidhur me kërkesat e familjeve që kanë persona të zhdukur. /Insajderi.com
