Kryeministri i Shqipërisë, Edi Rama, ka njoftuar se 15 mijë doza të vaksinës ‘Pfizer’ pritet të mbërrijnë në Shqipëri gjatë ditës së hënë, njofton Insajderi.
Rama, gjatë vizitës në shtëpinë e të moshuarve ku po vazhdon vaksinimi, tha se brenda dy javëve të para të marsit edhe COVAX do të nisë furnizimin me vaksinën AstraZeneca, e cila nuk është aprovuar për personat mbi 65 vjeç.
“Nesër mbërrijnë 15 mijë doza nga Pfizer dhe brenda dy javëve të para të marsit COVAX ka konfirmuar më në fund, nisjen e furnizimit me vaksinën AstraZeneca, të cilën do ta fusim menjëherë në procesin e vaksinimit të mësuesve”, ka thënë ai.
“Sfida është të garantojmë një sasi të konsiderueshme dhe të kemi lajme të mira shumë shpejt, por mos të flasim përpara kohe”, deklaroi Rama. /Insajderi.com
