Qeveria e Kosovës ka marrë vendim që të miratojë ndarjen e 6.8 milionë eurove si mjete buxhetore për furnizim me barna nga lista esenciale, njofton Insajderi.
Ky vendim i ekzekutivit është marrë në mbledhjen e sotme të Qeverisë së Kosovës e thirrur nga kryeministri Albin Kurti, pas kthimit të tij nga Brukseli.
Kurti ka përmendur pikat e rendit të ditës ku si pikë e cila u miratua në mbledhjen e Qeverisë ishte edhe shqyrtimi për ndarjen e mjeteve buxhetore për furnizim me barna nga lista esenciale.
Ministri i Financave, Punës dhe Transfereve, Hekuran Murati, ka thënë gjatë mbledhjes se mjetet nga pika 1 e këtij vendimi ndahen nga programi i rimëkëmbjes ekonomike.
“Ndahen mjete financiare 6,8 milionë euro në Ministrinë e Shëndetësisë në nënprogramin shërbime përkatëse farmaceutike. Mjetet nga pika 1 e këtij vendimi, ndahen nga programi i rimëkëmbjes ekonomike që të furnizohet sigurimi me barna esenciale nga Ministria e Shëndetësisë”, ka thënë Murati.
Kjo pikë është miratuar me votim pro të të gjithë ministrave.
Në këtë mbledhje Qeveria ka miratuar edhe Kornizën Afatmesme Buxhetore për vitet 2022-2024.
Ministri Hekuran Murati tha se kanë bërë më të mirën e mundshme për këtë dokument.
Ai tha dokumente parasheh ndihmë për shëndetësi, ekonomi e çështje sociale.
“Synimet janë mposhtja dhe përballjen me pandeminë si dhe rimëkëmbjen ekonomike”, tha Murati. /Insajderi.com
