Redaktori i gazetës zvicerane “NZZ”, Andreas Ernst, i ka reaguar kryediplomates kosovare, Donika Gërvalla-Schwarz, e cila të mërkurën deklaroi se në intervistën e saj të dhënë për këtë medium, ky i fundit ka pohuar “gënjeshtra se Ushtria Çlirimtare e Kosovës ka kryer vrasje të pasluftës”.
“NZZ publikoi pohimin e rremë se UÇK-ja kreu vrasje pas përfundimit të luftës. UÇK u shpërbë pas çlirimit të Kosovës në qershor 1999. Nëse krimet thuhet se janë kryer, ato bëhen nga individë, jo nga UÇK-ja”, ka thënë kryediplomatja kosovare.
Ndërkaq në reagimin e tij, Ernst është shprehur se gazetari që e ka shkruar tekstin nuk ka potencuar që UÇK-ja ka përgjegjësi kolektive për atë se çfarë ka ndodhur, por se kryerësit kanë përgjegjësi indivduale.
“Autori ynë Andi Reich ka shkruar se ‘krimet e pasluftës, kryesisht janë kryer nga anëtarët e Ushtrisë Çlirimtare të Kosovës’. Ai nuk pretendon që ka përgjegjësi kolektive të UÇK-së, por thotë se keqbërësit kanë përgjegjësi individuale”, ka shkruar redaktori i mediumit “NZZ”.
Ndërkaq, sa i përket deklaratës së Gërvallës se UÇK-ja është shpërbërë qershorit të vitit 1999, Ernst në reagimin e tij ka bashkëngjitur një raport të NATO-s, ku thuhet se UÇK-ja është shpërbërë më 20 shtator të atij viti.
“Përveç kësaj, në komunikatën e NATO-së thuhet nuk thuhet që UÇK-ja u shpërbë në qershor, por më 20 shtator 1999. NZZ e ka prezantuar situatën në mënyrë korrekte”, ka përfunduar redaktori për politikë të jashtme i gazetës zvicerane, Andreas Ernst./Insajderi.com
1/2 Die @NZZ hat die falsche Tatsachenbehauptung publiziert, dass nach dem Ende des Krieges die UÇK Morde begangen hätte.
Die UÇK wurde nach der Befreiung Kosovas im Juni 1999 aufgelöst. Wenn Verbrechen begangen worden sein sollen, dann von Individuen, nicht von der UÇK.— Donika Gërvalla-Schwarz (@gervallaschwarz) June 2, 2021