Qendra Kryesore e Mjekësisë Familjare në Deçan ka pranuar kontingjentin e dytë të barnave për të trajtuar qytetarët që dyshohet se janë helmuar nga uji i pijes, ka njoftuar Ministria e Shëndetësisë të enjten në mbrëmje.
Në komunikatën për media thuhet se Qeveria e Republikës së Kosovës vazhdon angazhimin dhe përkushtimin për të tejkaluar sa më shpejtë gjendjen emergjente në Komunën e Deçanit.
Pas dërgimit të kontingjentit të parë të barnave, me kërkesë të stafit udhëheqës të Qendrës Kryesore të Mjekësisë Familjare në Deçan, Ministria e Shëndetësisë ka dërguar sonte edhe kontingjentin e dytë të barnave.
“Sot ka pasur fluks më të vogël të qytetarëve që kanë kërkuar trajtim mjekësor dhe falë angazhimit të përbashkët të institucioneve përgjegjëse komunale dhe qendrore situata në Deçan tashmë është nën kontroll. Dje Qeveria ka ndarë 150 mijë euro për financimin e projektit për trajtim dhe rregullim të sistemit të ujësjellësit në këtë komunë”, thuhet më tej në komunikatë.
Agjencia e Menaxhimit të Emergjencave vazhdon të jetë në dispozicion me shërbime për ujë të pijshëm dhe çdo gjë tjetër të nevojshme në fushën që mbulon AME, sipas kërkesave nga Komuna.
Instituti Kombëtar i Shëndetit Publik është duke vazhduar hulumtimin dhe analizat për të evidentuar shkaqet e helmimit.
“Për këtë duhet të presim deri në rezultatet e analizave të fundit”.
“Qytetarëve të infektuar ju dëshirojmë shërim të shpejtë dhe i sigurojmë që Qeveria e Republikës së Kosovës, do t’u qëndrojë afër me përkujdesje dhe ilaçe deri në shërim të plotë”, thuhet në komunikatë./Insajderi.com
