Josip Mataija, shefi i Shërbimit të Sigurisë në Trafik në Kroaci, deklaroi të hënën se tragjedia në Kroaci, ku humbën jetën 10 pasagjerë të një autobusi që ishte nisur për në Kosovë, do të ishte më e vogël nëse udhëtarët do të ishin të lidhur me rripa të sigurisë, transmeton Insajderi.
Në një intervistë në Studio N1, Mataija theksoi se aksidenti në fjalë ishte i dyti më i rëndi në Republikën e Kroacisë.
“Ajo thjesht erdhi në vëmendjen tonë atëherë. Një pjesë e udhëtarëve ranë nga ai autobus dhe ai u përplas me ta. Nëse ata do të kishin qëndruar në automjet, tragjedia do të ishte më e vogël. Autobusët nga viti 2008 duhet të kenë rripa sigurimi. Ky autobus kishte rripa sigurie, por mesa duket disa pasagjerë nuk i përdorën ato.
Ligji është i njëjtë për të gjithë, i cili thotë se rripat e sigurimit duhet të përdoren nëse ato janë të instaluara në një automjet. Gjoba për dikë që nuk përdor rrip sigurimi është e njëjtë me të gjithë të tjerët, dhe kjo është një mijë kuna”, tha ai.
Mataija gjithashtu deklaroi që autobusi, i cili u ndalua nga një oficer policie, nuk do të nisej përsëri derisa të gjithë të lidheshin. Problemi, tha ai, është se njerëzit nuk qëndrojnë të lidhur.
“Pavarësisht se sa jeni afër vijës së finishit, nëse ndiheni të lodhur, duhet të ndaleni,” u tha më në fund ai shoferëve.
Një autobus me targa të Kosovës u aksidentua të dielën duke dalë jashtë rrugës në afërsi të Sllavonski Brodit dhe duke shkaktuar vdekjen e dhjetë pasagjerëve, gjersa dhjetëra të tjerë janë lënduar./Insajderi.com
