Prokuroria Themelore në Prishtinë, Departamenti i Krimeve të Rënda, ka ngritur aktakuzë ndaj Skënder Krasniqi, i cili dyshohet se nga pakujdesia ka vrarë djalin e tij, Albert Krasniqin.
Vrasja ka ndodhur më 27 janar 2021, në rrugën “Ndue Përlleshi”, në Prishtinë.
Lajmin për Shqip.com e kanë konfirmuar nga Prokuroria Themelore në Prishtinë.
“Ju njoftojmë se Departamenti i Krimeve të Rënda nga Prokuroria Themelore në Prishtinë, sot ka ngritur aktakuzë kundër personit me inicialet S.K., në drejtim të veprës penale ‘Vrasja nga pakujdesia’, sipas nenit 175 të KPRK-së”.
“Prokurori i rastit aktakuzën e ka proceduar në gjykatën kompetente për trajtim të mëtejmë”, thuhet në përgjigjen e kësaj prokurorie.
Skender Krasniqi dyshohet se më datë 27.01.2021 rreth orës 17:00, në parkingun e ndërtesës ku ka banuar, nga motive ende të panjohura deri më tani ka privuar nga jeta djalin e tij, dhe si pasojë e plagëve të marra Albert Krasniqi ka ndërruar jetë në vendin e ngjarjes.
Dy ditë pas vrasjes, Gjykata Themelore në Prishtinë ka aprovuar kërkesën e Prokurorisë Themelore në Prishtinë për caktimin e masës së paraburgimit kundër Skender Krasniqit për shkak të dyshimit të bazuar se ka kryer veprat penale “Vrasje e rëndë”.
Ndërkaq vëllai i Skenderit, Ismet Krasniqi ka thënë se kjo “vrasje është tragjedi për familjen”, dhe sipas tij, arma të cilën e kishte pasur në dorë i vëllai “ka shkrepur rastësisht”./Insajderi.com
