Kryeministri i Kroacisë, Andrej Plenkoviq, ka shprehur gatishmërinë e tij për ta ndihmuar Kosovën në rrugën drejt integrimit evropian dhe liberalizimit të vizave, njofton Insajderi.com.
Pas takimit të tij me kryeministrin Albin Kurti, Plenkoviq u shpreh i lumtur që pas 10 vitesh gjendet në Kosovë.
Ai njoftoi se kryeministrin e Kosovës, Albin Kurti, është biseduar për marrëdhëniet bilaterale e po ashtu edhe miqësore mes dy vendeve.
“Ne punojmë që të ndihmojmë Kosovën në rrugën e saj evropiane e po ashtu do ta ndihmojë për liberalizimin e vizave. Ju e dini që Kroacia është anëtarja më e re aty dhe se do t’u ndihmojë sa i përket transformimit”, ka thënë Plenkoviq.
“Kemi shumë vend për të rritur më tepër ekonominë. Qëndrimi i përfaqësuesve të korporatave do të ndihmojë dhe do të kenë takim edhe me Telekomin”, ka thënë Plenkoviq, që ka folur edhe për aksidentin e autobusit me pasagjerë kosovarë në Kroaci para disa muajve ku vdiqën dhjetë mërgimtarë kosovarë.
Plenkoviq ka shprehur mirënjohjen ndaj mjekëve që kanë ndihmuar në rastin e aksidentit në Slavonski-Brod, ndërsa ka treguar se në vizitë me të në Kosovë është edhe njëri nga mjekët që ndihmoi pasagjerët e lënduar kosovarë Josip Samaxhiq. Plenkoviq ka treguar se me të ka ardhur në Kosovë edhe kampioni olimpik nga “Rio 2016”, Josip Glasnoviq, që është me prejardhje nga Janjeva.
“Këtu me mua është edhe kampioni olimpik nga “Rio 2016”, Josip Glasnoviq, që fitoi të artën në qitje. Ai është me rrënjë nga Janjeva, kemi kampion olimpik nga Kroacia, familjarët e të cilit u vendosën në Kroaci nga Janjeva. Ky është një detaj tjetër për lidhjen e Kroacisë me Kosovën”, ka thënë Plenkoviq.
Ai ka thënë se shpreson që të vazhdojë dialogu Kosovë – Serbi.
“Qëndrimi i Kroacisë është që të përkrahim dialogun e stabilitetit e të mos ketë situata si ajo para disa javëve. Kroacia është e interesuar të ketë marrëdhënie të mira me Kosovën dhe të përmirësojë marrëdhëniet me Serbinë”, tha Plenkoviq. /Insajderi.com
