Familjarët e gjashtë shtetasve turq, të arrestuar sot në Kosovë, për t’u dëbuar në Turqi – ku ata akuzohen për gjoja terrorizëm, si njerëz të Fethullah Gylenit – kanë thënë se nuk kanë kontaktuar me ta që prej arrestimit të tyre.
Ata kanë thënë në emisionin “Pressing”, me Leonard Kerqukin, në T7, se familjarët e tyre u nxorën nga mësimi, për t’u arrestuar.
Kanë bërë të ditur se kanë dëgjuar informata të ndryshme rreth familjarëve të tyre, që i kanë siguruar nëpërmjet mediave.
“Sipas disa informatave, ata ndodhen në aeroport. Sipas disa të tjerave, ndodhen në ambasadën turke”, kanë thënë familjarët e të arrestuarve.
Ata kanë thënë se zyrtarisht nuk kanë ndonjë informatë të vetme rreth familjarëve të tyre të arrestuar sot.
