Kryetari i Kuvendit të Kosovës, Kadri Veseli, ka thënë se është i befasuar me gjuhën e Erdoganit të përdorur ndaj kryeministrit të vendit, Ramush Haradinaj.
“Jemi të befasuar me deklarimet e Presidentit te Republikës së Turqisë, z. Rexhep Taip Erdogan, të drejtuara ndaj Kryeministrit të Republikës së Kosovës, z. Ramush Haradinaj, në një kohë kur institucionet e Republikës së Kosovës po trajtojnë në hollësi veprimet që çuan në arrestimin dhe deportimin nga Kosova në Turqi të gjashtë shtetasve turq”, ka shkruar Veseli.
Ai ka thënë se këto deklarime janë shqetësuese, sidomos nga një lider i një vendi mik të Kosovës, siç është Turqia.
“Këto deklarata janë shqetësuese, sepse vijnë nga lideri i një vendi mik, mbështetja e të cilit shtet është dëshmuar në vazhdimësi para dhe gjatë gjithë ekzistencës së shtetit tonë. Andaj, deklarimet e tilla nuk i kontribuojnë forcimit të miqësisë dhe bashkëpunimit te ndërsjellë, për çka vendi ynë ka qenë dhe është i përkushtuar”, ka shtuar ai.
Më tej Veseli ka thënë se institucionet e Kosovës janë sovrane dhe nuk i nënshtrohen asnjë presioni të jashtëm.
“Veprimet e institucioneve të Republikës se Kosovës janë sovrane dhe si të tilla nuk mund t’u nënshtrohen presioneve të jashtme. Në këtë drejtim, edhe marrja në përgjegjësi e bartësve të institucioneve të sigurisë është çështje e brendshme dhe në diskrecion të lidershipit të Kosovës”, ka shkruar tutje kryetari i Kuvendit, Kadri Veseli.
Sipas Veseli, Kosova do ta vazhdojë rrugën e vet evropiane dhe me respekt të ndërsjellë me të gjitha shtetet që e duan një gjë të tillë.
“Republika e Kosovës do të vazhdojë pa kompromis rrugën e vet evropiane, të forcimit te vlerave perëndimore dhe demokratike, duke ofruar bashkëpunimin e vet me të gjitha ato shtete mike që duan raporte të respektit të ndërsjellë, duke përfshirë edhe Republikën e Turqisë”, ka përfunduar Veseli./Insajderi.com
