Policia e Kukësit ka ndaluar 23 persona, të cilat dyshohet se janë të përfshirë në përplasjet me forcat e policisë në protestën e mbajtur dje kundër tarifave në “Rrugën e Kombit”.
Në një njoftim nga Drejtoria e Përgjithshme e Policisë së Shqipërisë thuhet se janë ekzekutuar urdhër-ndalimet e Prokurorisë së Rrethit Gjyqësor Kukës për 23 shtetas, banorë të Kukësit.
“Ndalimi i tyre u bë pasi gjatë protestës së zhvilluar më datë 31 mars në Rrugën e Kombit, pranë Tunelit të Kalimashit, te kabinat e kalimit me pagesë të automjeteve, kanë ushtruar dhunë ndaj punonjësve të policisë, si dhe kanë shkatërruar me zjarr kabinat”, theksohet në njoftim.
Për të ndaluarit vazhdojnë hetimet për veprat penale “Shkatërrimi i pronës”, “Shkatërrimi i pronës me zjarr” dhe “Kundërshtim i punonjësit të rendit publik”.
Kujtojmë se dje qytetarë të Kukësit dhe zonave përreth kanë protestuar pranë Tunelit të Kalimashit në “Rrugën e Kombit”, duke kundërshtuar tarifën për kalimin e automjeteve.
Gjatë protestës mbetën të plagosur 13 punonjës të policisë dhe disa qytetarë, gjatë përplasjeve mes protestuesve dhe forcave të policisë, ndërsa u është vënë zjarri objekteve të sporteleve ku është planifikuar të bëhet pagesa për kalimin e automjeteve, duke i dëmtuar.
Ministria e Infrastrukturës dhe Energjisë e Shqipërisë njoftoi disa ditë më parë se pas testimit të sistemit për tarifat e kalimit të automjeteve do të përcaktohet data e fillimit të kalimit kundrejt pagesës.
Për motorët është caktuar tarifa prej 2.5 euro dhe për veturat 5 euro, ndërkohë kjo kundërshtohet nga banorët e Kukësit, por edhe nga shoqatat e biznesit si në Shqipëri ashtu edhe në Kosovë.
