Teatri Kombëtar ka probleme serioze me kanalizimin e ujërave të zeza prej kohës që është rregulluar sheshi në qendër Prishtinës.
Ushtruesja e detyrës së drejtorit të Teatrit Kombëtar, Kumrije Hoxha ka thënë se gjendja brenda objektit është jo e mirë prej ujërave të zeza.
Ajo tregoi se një punëtor teknik i këtij institucioni kujdeset për ta zbrazur ujin që është i grumbulluar në bodrumet e Teatrit.
Por sot Ministri i Kulturës, Kujtim Gashi gjatë inspektimit të objektit të Teatrit ka premtuar se kjo cështje do të rregullohet.
Gashi tha se do të takohet me njerëz kompetent dhe me kryetarin e komunës së Prishtinës, Shpend Ahmetin për ta eliminuar problemin që ka kohë të gjatë Teatri Kombëtar.
Gjithashtu ai deklaroi se do ta shqyrtojnë buxhetin dhe të ndahen mjete për rregullimin e problemeve që ka ky institucion i kulturës.
