Duke folur rreth zhvillimeve të fundit brenda AKI-së, Anton Quni, anëtar i Komisionit parlamentar për Mbikëqyrjen e AKI-së (nga LDK), ka bërë të ditur se ky komision ka ardhur në përfundimin se AKI nuk është më nën kontroll të komisionit.
“Ne anëtarët e komisionit për mbikëqyrjen e AKI-së në takimin e fundit kemi ardhur në një konstatim të përbashkët se Agjencia e Kosovës për Inteligjencë për momentin nuk është nën kontroll, nën mbikëqyrjen e komisionit parlamentar”, ka thënë ai për gazetën “Zëri”.
E sa i përket emërimit të drejtorit të ri, Quni ka thënë se janë dy krerët e shtetit që do të vendosin për këtë brenda një afati kohor, që është i përcaktuar me ligj.
“Janë autoritetet në këtë rast presidenti dhe kryeministri. Brenda 20 ditëve duhet ta emërojnë drejtorin e ri të AKI-së”, ka theksuar ai, duke shtuar se komisioni do të kërkojë në vazhdimësi raportim nga AKI-ja.
Ish-drejtori i AKI-së, Driton Gashi ka dorëzuar para dy jave detyrën e tij pas dëbimit të gjashtë gylenistëve nga Kosova.
Ndërsa Ministrin e Punëve të Brendshme, Flamur Sefajn kryeministri Ramush Haradinaj ka shkarkuar nga detyra e tij.
