Shpend Maxhuni, i cili që nga sot është emëruar në drejtor të AKI-së nga presidenti Hashim Thaçi dhe kryeministri Ramush Haradinaj nuk e ka kaluar testin e sigurisë që AKI ua bën zyrtarëve të shtetit dhe atyre të sigurisë.
Kështu tha sot deputeti i Lëvizjes Vetëvendosje, Rexhep Selimi. Ai në seancën e jashtëzakonshme ku po diskutohet për raportin e BE-së për Kosovën, tha se me këtë vendim raporti i vitit 2019, do të jetë më i keq se ky i këtij viti.
Ai këtë emërim të Maxhunit në krye të AKI-së e quajti arrogancë të krerëve shtetërorë të Kosovës.
Për deputetin Selimi, tashmë drejtori i AKI-së, Shpend Maxhuni, ka qenë prodhues vendor i skandaleve brenda Policisë së Kosovës, në kohën sa ky ka udhëhequr me të.
“Është emëruar një person i cili ka qenë prodhues vendor i skandaleve brenda së cilës ka udhëheq. Ne kemi qenë kërkues që atë ta ngarkojmë me përgjgjësi për atë çka ka ndodhur në institucionet që ai i ka udhëheq. Kryeministri dhe presidenti e ngarkojnë me detyra të reja, duke e avancuar atë në krye të një institucioni shumë delikat. Tash unë do të paragjykoje, por nuk kam frikë se po paragjykojë se qysh do të jetë raporti i Progresit për vitin 2019. Do të fillojë nga sot Raporti i 2019-ës. Përshembull nuk është çudi që në raportin e 2018-ës, nuk është marrë seriozisht dhe nuk është përkthyer madje. E në raportin e 2019-ës, mund të shkruhet dhe normalisht do të shkruhet se në krye të AKI-së është vendosur një person që sa ishte polic nuk e kaloi verifikimin e sigurisë nga vetë AKI-ja. Paramendoni ai që është caktuar në krye të AKI-së nuk e ka kaluar verifikimin e sigurisë të caktuar nga vetë AKI-ja. Ja deri ku shkoi arroganca e krerëve të institucioneve të Republikës së Kosovës” ka thënë Rexhep Selimi.
Shpend Maxhuni ishte emëruar drejtor i Policisë në vitin 2011, ndërsa është pjesë e Policisë së Kosovës që nga viti 1999.
Para Maxhunit, në postin e shefit të AKI-së ishte Driton Gashi i cili dha dorëheqja pas kërkesës së kryeministrit Haradinajt për ta liruar detyrën pas aferës së deportimit misterioz të 6 shtetasve turq./Insajderi.com
