Presidenti i Republikës së Kosovës Hashim Thaçi e ka përkujtuar masakrën më të madhe në Evropë pas Luftës së Dytë Botërore, atë të Srebrenicës.
“Sot i bashkohemi qytetarëve të mbarë botës, të cilët po e kujtojnë masakrën më të madhe pas luftës së dytë botërore në Evropë, masakrën e Srebrenicës”, ka shkruar presidenti në Facebook.
“Fëmijë, gra e burra u vranë egërsisht, prandaj vetëm njohja e së kaluarës dhe dënimi i kryerësve të gjenocidit, do të shërojë plotësisht dhembjen e familjarëve të tyre”, ka shtuar ai.
Ai ka thënë se kjo masakër nuk i dha mësim Millosheviqit, i cili më pas erdhi në Kosovë dhe bëri masakra tjera.
“Masakra e Srebrenicës, 23 vjet më parë, fatkeqësisht nuk e ndali regjimin e Millosheviqit të kryejë masakra të tjera në Kosovë, me përmasa të një gjenocidi të ri”, ka shkruar tutje ai.
“Republika e Kosovës asnjëherë nuk do të heqë dorë nga kërkimi i së vërtetës dhe dënimi i kryerësve të këtyre masakrave”, ka përfunduar ai./Insajderi.com
