Partia Demokratike përmes një deklarate për shtyp nga deputetja Albana Vokshi u shpreh se Edi Rama është prej 20 vjetësh armiku kryesor i Teatrit Kombëtar.
Sipas saj nga plani i tij mafioz për të ndërtuar 6 kulla në zonën e Teatrit, Edi Rama fiton të paktën 205 milionë euro.
Vokshi tha se që kur ka marrë pushtet në vitin 1998, kur u bë Ministër Kulture, Teatri Kombëtar dhe denigrimi i artistëve ka qenë në shënjestrën e Edi Ramës, i cili ka kryer veprime konkrete për shembjen e tij dhe betonizimin e Qendrës Historike të kryeqytetit.
Reagimi
Me të marrë detyrën, 20 vjet më parë, Edi Rama caktoi se godina rrezikohej nga zjarri dhe urdhëroi mbylljen e sallave të shfaqjeve.
Dha me qera me 1USD/m2 ambientet e Teatrit Kombëtar, i cili u kioskëzua, u kthye në bingo dhe bar kafe, duke e zhytur teatrin në borxhe për shkak të lidhjeve të paligjshme të bizneseve të Ramës brenda Teatrit.
Edhe kundërshtia e tij me Pandeli Majkon për Teatrin është 20 vjeçare, sepse ish kryeministri doli në krah të artistëve, të cilët kërkuan rikonstruksionin e Teatrit që, në atë kohë, sipas studimit të kryer, kushtonte vetëm 1 milionë USD.
“Edi Rama Ministër Kulture devijoi qëllimshëm çdo fond buxhetor dhe të donatorëve të destinuar për Teatrin në projekte personale. Këtë gjë ai e bëri edhe si Kryetar Bashkie, kohë gjatë së cilës promovoi idenë e ndërtimit me koncesion të Teatrit Kombëtar. Kjo ide e vitit 2002 dështoi për shkak të protestave të artistëve. Si kryeministër, Edi Rama, mashtroi artistët, të cilëve u kishte premtuar para ardhjes në pushtet rikonstruksionin e plotë të Teatrit Kombëtar. Kjo jo vetëm nuk ndodhi, por ai u soll njësoj si në 1998-ën”, tha Vokshi.
Sipas saj, me përvojën e 20 përqindëshit për çdo leje ndërtimi në bashki, Edi Rama e perfeksionoi skemën e korrupsionit dhe pastrimit të parave të pista.
“Partia Demokratike publikoi dje të dhëna konkrete sesi Edi Rama në shkurt 2016 vendosi përgjysmimin e çmimit të truallit në zonën e Teatrit Kombëtar, një muaj para se kompania guackë e përzgjedhur prej tij për pastruar paratë pista, Fusha shpk, bleu një pronë në të njëjtën zonë”.
“Në Planin e Përgjithshëm Vendor të Tiranës 2017, ndryshe nga zonat e tjera ku sipërfaqja e ndërtimit, koeficienti i shfrytëzimit dhe numri i kateve janë të përcaktuara, në zonën ku është Teatri gjithçka u la hapur, që ta vendosë vetë Edi Rama në bazë interesave të tij financiarë”.
“Sipas përllogaritjeve të ekspertëve fitimi minimal për 1 kullë është 34.2 milionë euro. Fitimi i planifikuar nga Edi Rama nëpërmjet skemës mafioze të grabitjes së pronës publike duke shembur Teatrin për të ndërtuar 6 kulla është të paktën 205 milionë euro”, tha Vokshi.
