Në ditën kur Kosova tentoi por nuk arriti të blhej vend anëtar i INTERPOL-it, është shteti i anëtarësuar në Bashkimin Evropian dhe NATO-në, Lituania, e cili mund të largohet nga Organizata Ndërkombëtare e Policisë.
Lituania është shteti fqinj i Rusisë, i cili po konsideron daljen nga INTERPOL-i, nëse në krye të kësaj organizate vjen Aleksandr Prokopchuk – një zyrtar i lartë i qeverisë ruse i cili është kandidat serioz për të fituar mandatin e parë në krye të INTERPOL-it.
Parlamenti i Lituanisë ka miratuar sot një rezolutë që thekson se Lituania do largohet nga INTERPOL-i nëse në krye të organizatës zgjedhet Prokopchuk.
Me 88 vota për dhe asnjë kundër, Parlamenti i Lituanisë votoi rezolutën, e cila e konsideron Aleksandr Prokopchukun një person jo të denjë për pozitën e kreut të INTERPOL-it.
Asambleja e Përgjithshme e INTERPOL-it do të votojë të mërkurën, më 21 nëntor, lidhur me kreun e ri të organizatës. Aty do të mësohet nëse Prokopchuk do arrijë të vendoset në krye të INTERPOL-it. Ndërkaq, siç raportojnë mediet ndërkombëtare, edhe shtete të tjera të NATO-së dhe Bashkimit Evropian do të konsiderojnë largimin nga organizata, nëse zyrtari rus zgjedhet shef i INTERPOL-it.
Kosova nuk ka arritur të bëhet sot vend anëtar i INTERPOL-it, pasi që nuk mori shumicën e nevojshme, prej dy të tretave të votave të vendeve pjesëmarrëse në Asamblenë e Përgjithshme të kësaj organizate, që po mbahet në Dubai.
Në rrethin e parë të votimit, anëtarësimin e Kosovës në INTERPOL e mbështetën 76 shtete, kundër saj ishin 56 shtete, kurse 22 abstenuan. Ndërkaq, në rrethin e dytë të votimit, Kosova mori 68 vota për, 51 kundër dhe 16 abstenime.
Ndërkohë që Kosova ka dështuar, INTERPOL në faqen zyrtare ka njoftuar se Asambleja e Përgjithshme ka votuar për anëtarësimin e dy vendeve të reja, Kiribati and Vanuatu, të cilat janë tashmë anëtare të kësaj organizate. INTERPOL tani numëron 194 shtete anëtare.
