Aleanca për Ardhmërinë e Kosovës thotë se Jonuz Salihaj u shkarkua nga pozita e drejtorit të Drejtorisë së Arsimit në Komunën e Prishtinës, për shkak të performancës së tij të dobët.
Kryesia e Degës dhe Këshilli Drejtues i Degës së AAK-së në Prishtinë thotë se ka përcjellë në vazhdimësi punën dhe performancën e të gjithë drejtorëve të emëruar nga AAK-ja në Prishtinë.
“Pas shumë ankesave të qytetarëve në adresë të z. Jonuz Salihut për mospërgjigje, për mospërfillje, për anashkalime dhe injorim, gjithashtu në bazë të analizës së ekspertëve tanë të arsimit, niveli i tij i performancës profesionale nuk ka qenë i kënaqshëm”, thuhet në reagimin e degës së AAK-së në Prishtinë.
Lexo edhe: Ahmeti, “AAK-ja kërkoi të shkarkohej Salihaj, sepse nuk përfaqëson interesat e tyre”
Sipas të njëjtit, “Këshilli Drejtues i Degës së AAK-së në Prishtinë me votim unanim ka kërkuar nga Shpend Ahmeti largimin nga detyra e Drejtorit te Arsimit, z.Jonuz Salihaj”.
Në reagimin që mban firmën e kryetarit të degës së AAK-së në Prishtinë, Brahim Mehmeti, është e pavërtetë se Salihaj u shkarkua sepse “nuk pranoi të regjistrojë fëmijë nëpër shkolla ose të bëj punësime politike”.
AAK është në bashkëqeverisje në Prishtinë, me Shpend Ahmetin, tash kryetar i PSD-së. Pas arritjes së marrëveshjes për bashkëqeverisje dhe pas ndarjes së pushtetit AAK-ja e Prishtinës kishte marrë drejtimin e tri drejtorive, atë të Arsimit, të Inspekcionit dhe atë të Sportit.
