Ish- zëvendësministrja e Drejtësisë, Vesna Mikic pavarësisht se paralajmëroi se do të dalë në vendin e punës edhe pas shkarkimit që i bëri kryeministrit, ajo sot nuk ka shkuar në zyrën e saj. Madje, stafi i Mikic sot kanë dorëzuar të gjitha asetet që kanë pasur në shfrytëzim.
Lajmin për Insajderin e kanë konfirmuar nga zyra për komunikim e ministrisë së Drejtësisë.
“Pas marrjes së vendimit për lirim nga detyra, stafi mbështetës i ish-zëvendësministres, Vesna Mikic sot ka dorëzuar të gjitha asetet që kanë pasur në shfrytëzim”, thuhet në përgjigjen nga zyra për komunikim.
I pari i ekzekutivit ka deklaruar se individët që denigrojnë vlerat e përbashkëta euro-atlantike nuk kanë vend në institucionet e Kosovës, pa marrë parasysh përkatësinë etnike.
“Në Qeverinë dhe institucionet e Republikës së Kosovës, nuk kanë vend individët, pavarësisht përkatësisë etnike, që denigrojnë vlerat e përbashkëta euro-atlantike. Aq më tepër kur shteti i Kosovës është krijuar pikërisht në bazë të këtyre vlerave”.
“Deklarata e zëvendësministres në Ministrinë e Drejtësisë, Vesna Mikiq, se bombardimet e NATO-s ishin gjenocid ndaj shtetit dhe popullit serb, janë të papranueshme dhe përkojnë me gjuhën e urrejtjes, që sanksionohen me Kushtetutë dhe ligj. Prandaj, sot kam liruar nga detyra zëvendësministren Mikiq”, ka shkruar Haradinaj në Facebook.
Vesna Mikic e shkarkuara nga kryeministri Ramush Haradinaj nga posti i zëvendësministres së Drejtësisë, ka thënë se Haradinaj ka të drejtë të zvogëlojë ministrat dhe zëvendësministrat, por se mënyra se si e bëri atë tregon se është “larg nga normat demokratike në Kosovë”.
Mikiq e cila u shkarkua pasi shkruajti në Facebook se “NATO me fushatën ajrore kundër Jugosllavisë kreu një gjenocid të qëllimshëm”, njoftoi se do të shkojë në punë sot dhe do të kërkonte një zgjidhje personalisht për inspektim.
“Isha në atë vend për shkak të popullit tim dhe nëse bëra një shkelje duke thënë se Serbia po luftonte kundër terrorizmit shqiptar, le të ma dëshmojnë të kundërtën”, tha ajo për RTS./Insajderi.com
