Beqaj: Ofrova sot dorëheqjen tek kryeministri, jam i pafajshëm

Ministri i Inovacionit, Besim Beqaj, i cili u shkrakua të mërkurën nga pozita e ministrit me vendim të kryetarit të PDK-së, Kadri Veseli, ka thënë sot se ka ofruar dorëheqjen tek kryeministri Ramush Haradinaj.

Beqaj ka deklaruar se e mbështet vendimin e kryetarit të PDK-së, Kadri Veseli, për t’i liruar nga pozita zyrtarët dhe anëtarët e kësaj partie, të cilët kanë aktakuza të ngritura.

“Unë sot kam paraqitur dorëheqjen time tek kryeministri i Kosovës, Ramush Haradinaj”, ka thënë Beqaj.

Ministri Beqaj është shprehur se është i pafajshëm lidhur me aktakuzën të cilën Prokuroria e Shtetit ka ngritur ndaj tij për veprën penale të “shkeljes së statusit të barabartë të shtetasve dhe banorëve të Republikës së Kosovës në bashkëkryerje”.

“Është parim bazë e drejtësisë që gjithkush është i pafajshëm derisa të vërtetohet e kundërta. Vepra për të cila dyshohem nuk ka asnjë element të korrupsionit”, ka thënë Beqaj.