Koalicioni AAK-PSD është pritur në Deçan. Para simpatizantëve, përfaqësuesit e koalicionit kanë shprehur falënderim për mbështetjen dhe janë deklaruar se 6 tetori do të jetë ditë e fitores.
Para qytetarëve të Deçanit, kandidatja për deputete nga kjo komunë dhe zëdhenësja e PSD-së, Natyra Kuçi, ka thënë se fitorja e koalicionit AAK-PSD është garancë për Kosovën shtet 100%.
“100% guxim, 100% dije dhe 100% angazhim – kjo është ajo që i nevojitet vendit tonë dhe ajo që aleanca jonë është e gatshme të japë. Ky është premtimi ynë dhe kjo është detyra jonë. Më 6 tetor do të vendosni, në cilin drejtim shkon Kosova”, ka thënë Kuçi.
Ajo ka qenë e ashpër edhe ndaj partive te tjera.
Kuçi ka shtuar tutje se Kosova nuk mund të vazhdojë me qeverisje të PDK-së, e cila është fajtore për gjendjen në vend. Për LDK’në ajo shtoi se ka fytyrë të re aktualisht, por tha se pas timonit të saj qëndrojnë fytyrat e vjetra të kësaj partie. Kurse, për VV-në, Kuçi tha se Kosova nuk ka komoditet të eksperimentojë me të ardhmen.
Ndryshe, Kuçi në zgjedhjet e 6 tetorit garon me numrin 30 në listën e koalicionit AAK-PSD.
