Sa herë Kryeministri Rama ka nevojë, hapësirat e programit mjaft të njohur në Itali, Porta a Porta, janë të lira për të. Kështu ndodhi edhe këtë radhë kur Bruno Vespa e Vitorio Zgarbi ia bënë qokën.
Megjithatë, dy momente pikante u shënuan gjatë intervistës së tij. E para ishte një “kthim me këmbë në tokë” që i bëri drejtuesi i emisionit, Bruno Vespa, kur Kryeministri po shprehte optimizmin e tij nga premtimet e qeverive të Bashkimit Evropian. Patetizmi i Kryeministrit arriti deri aty sa të krahasojë “dëshirën e zjarrfikësve tuaj me atë të politikanëve” kur tha: “Shpresoj shumë që Evropa të mos na lërë vetëm .Shpresoj që në politikanët të gjej të njëjtën dëshirë me atë të zjarrfikësve tuaj”.
Ky ishte momenti kur u ndërpre nga Vespa: “Kujdes se edhe ne na premtuan pafund të gjitha shtetet kur na ra tërmeti por pak, shumë pak e mbajtën premtimin”. Duket se Kryeministrit kjo deklaratë i ra si një dush me ujë të ftohtë që e ktheu nga realitet.
Së dyti ishte replika e Sgarbit (kritik arti shumë i njohur) për idenë e Kryeministrit për ndërtimin e disa lagjeje Tiranë dhe Durrës me arkitekt Stefano Boerin dhe Marko Casamontin. Ky i fundit është arkitekti i preferuar i Kryeministrit (arkitekti i stadiumit të ri në Tiranë).
Kjo deklaratë e Kryeministrit për ndërtimin e lagjeve në Tiranë dhe Durrës, pa u konsultuar më parë me specialistë, inxhinierë, urbanistë apo arkitektë tashmë nuk habit askënd në Shqipëri. Madje nuk habiti as Vespën apo Zgarbin që nuk u morën fare me vendimin e tij prej Autoriteti Absolut por u morën me projektuesin e këtyre lagjeve duke e vënë në diskutim emrin e tij. Por Kryeministri kurrsesi nuk mund të lejonte të cenohej reputacioni i arkitektit të tij të preferuar ndaj me të njëjtin cinizëm që u drejtohet edhe banorëve të dëmtuar nga tërmeti, gazetarëve në terren apo edhe Kryetarit të Bashkisë së Tiranës iu drejtua edhe Sgarbit “Do të thërrasim ty për të bërë supervizorin”!
