Duke shpërndarë maska dhe pamflete informuese para Ministrisë së Ambientit, Ministrisë së Infrastrukturës dhe Komunës së Prishtinës, vullnetarë të Iniciativës #MerrFrymë janë munduar që të tërheqin vëmendjen e qytetarëve dhe institucioneve për ndotjen e ajrit në kryeqytet dhe rrethinë.
Sipas tyre ndotja e ajrit është duke vazhduar të ngufasë dhe rrezikojë shëndetin e qytetarëve çdo ditë.
#MerrFrymë nstitucionet përkatëse nuk janë duke e bërë punën e vet në ndërmarrjen e hapave emergjent, ndërsa të sëmurit me probleme në zemër e frymëmarrje po shtohen çdo ditë.
“Arsyeja pse sot kemi shpërndarë maska dhe pamflete pikërisht para institucioneve është fakti se Ministria e Ambientit është organ ombrellë që duhet të iniciojë dhe mbikëqyrë punën e organeve tjera në drejtim të përmirësimit të ambientit, ndërsa me paraqitjen e gjendjes së rëndë të ajrit është munduar që ta quaj atë jo aq të rëndë”, thuhet në komunikatën e Iniciativës “Merr Frymë”.
Ministria e Infrastrukturës sipas kësaj Iniciative mbanë përgjegjësinë e kontrolleve teknike, të cilat ende nuk i kontrollojnë veturat për nivelin e emetimit të gazrave.
Ndërsa Komuna e Prishtinës sipas tyre, mbanë përgjegjësi për mosveprim në një situatë e cila pati tejkaluar çdo normë dhe “pasi që kishte bërë premtim për masa emergjenete doli me një listë masash kryesisht inspektive për të cilat ende nuk ka bërë ndonjë raportim”.
“Deri në një masë moti ka qenë i mirë me neve, pasi ka shpërndarë smogun deri diku, por megjithatë niveli gati gjithmonë ka qenë në zonën ‘Unhealthy’ që në shqip do të thotë i pashëndetshëm, ndërsa në momentet kur nuk ka pasur reshje dhe erëra gjithmonë ka qenë në ‘Hazardous’ – i rrezikshëm”, thuhet në këtë njoftim./Insajderi.com
