Me sa familje pati kontakt i infektuari në Kamenicë, kryetari Kastrati jep detaje

Numri i të infektuarve me koronavirus në Kosovë, tashmë ka arritur në 108.

E, tashmë nga ky numër kemi edhe të infektuarin e parë në Komunën e Kamenicës, saktësisht në fshatin Topanicë, shkruan Insajderi.

Rreth këtij rasti, më shumë detaje ka dhënë kryetari i Komunës së Kamenicës, Qëndron Kastrati, në një intervistë për Insajderin.

Kastrati, ka treguar se i infektuari ka hyrë në Kosovë më 18 mars dhe ka qenë vozitës i një prej linjave Kosovë-Gjermani, të një agjencioni që është kompani kosovare.

Duke, folur për këtë rast, kryetari ka treguar se edhe me sa familje mund të ketë pasur kontakt i infektuari.

“Deri tash ne kemi ardhë në një listë prej 14 familjesh të cilat janë shumë afër dhe janë të afërt dhe që kanë mujt me pas kontakt, pra janë rreth 14 familje që i kemi të identifikuara dhe tash ia kemi ofruar IKSHP-së, dhe ata i kanë kontaktu përmes telefonit dhe varësisht prej simptomave do të vendoset se si do të ndodhë”, ka thënë Kastrati, për Insajderin.

Kastrati, ka treguar po ashtu se pas sa ditëve personi i infektuar ka filluar ti ndjej simptomat e para.

Ndërsa, duke folur për karantimin e fshatit Kamenicë, ka thënë se karantimi nuk është më zgjidhje.

“Mendoj se karantimi nuk është më zgjidhje, për arsye se po iu jepet përshtypje të tjerëve që ata janë të lirë me lëviz dhe me vepru . Po e marr shembull një fshat tjetër në Kamenicë mendon që tash ne jemi çdo gjë në rregull dhe mundemi me vazhdu, ndërsa ju shkaktohen vështirësitë fshatit Topanicë”, ka thënë ai.

Deri më tani, numri i të infektuarve në Kosovë me koronavirus ka arritur në 108, ndërsa është shënuar edhe viktima e parë mashkull i moshës 82 vjeç./Insajderi.com