Për vite me radhë Lëvizja Vetëvendosje, ka akuzuar krerët e Policisë së Kosovës për lidhje me politikën. Zyrtarë të partisë që e drejton Albin Kurti, por edhe vet ai, shumë herë kanë organizuar edhe konferenca për t’i denoncuar drejtuesit e organeve të rendit për lidhjet e tyre me Partinë Demokratike të Kosovës dhe Shërbimin Informativ të Kosovës (ShIK), shkruan Insajderi.
Njëri nga ta është edhe drejtori aktual i Policisë së Kosovës, Rashit Qalaj, i cili ishte në thumb të zyrtarëve të Vetëvendosjes, të cilët akuzuan atë se është njeri i politikës, konkretisht i lidhur me ShIK-un dhe krerët tij, Kadri Veseli e Elmi Reçica.
“Policia e Kosovës nuk po e lufton krimin e organizuar dhe korrupsionin, por këtu ka angazhuar gjithë arsenalin e saj në shtypjen dhe arrestimin e opozitës. Rashit Qalaj, njëri prej drejtuesve të policisë ka edhe lidhje të ngushtë me deputetin e PDK-së, Elmi Qeqica. Segmente të caktuara, drejtues të policisë janë pjesëmarrës në krim dhe korrupsion”, kishte thënë Mirsad Shkreta, anëtar i Vetëvendosjes, aktualisht këshilltar i ministrit të Shëndetësisë, Arben Vitia.
Tani me të ardhur në pushtet, Lëvizja Vetëvendosje, ka filluar shkarkimin e bordeve të ndërmarrjeve publike, agjencioneve të cilët i konsideronte të lidhur me politikën.
Por, a do ta ketë të njëjtin fat edhe drejtori i Policisë së Kosovës, Rashit Qalaj, i cili duket qartë se nuk është i preferuari i kryetarit të Vetëvendosjes, Albin Kurti, aktualisht kryeministër në detyrë.
Vet drejtori i Policisë së Kosovës, Rashit Qalaj, thotë se nuk është i preokupuar nëse do të shkarkohet nga kryeministri në detyrë Kurti.
Në një intervistë për Televizionin T7, Qalaj, ka theksuar se preokupimi i tyre i vetëm është ta kryejnë detyrën sa më mirë që është e mundshme.
“Kjo është pyetje që besoj duhet t’ia drejtoni Qeverisë së Kosovës. Ne, Policia e Kosovës ajo që është në mandatin tonë është ta kryejmë detyrën tonë sa më mirë që është e mundur dhe ky është preokupimi ynë kryesor”, ka thënë Qalaj.
Drejtori Qalaj që nga ardhja në krye të Policisë, kanë ndodhur jo pak skandale në institucionin që ai udhëheq.
Një prej tyre ishte edhe dërgimi i gazit lotsjellës në Shqipëri, duke ia huazuar Policisë së Shqipërisë gjatë protestave që i organizonte opozita atje.
Gazeta Online Insajderi, kishte zbuluar një marrëveshje të dyshimtë të nënshkruar mes Rashit Qalajt, drejtorit të Policisë së Kosovës dhe Ard Veliut, drejtorit të Policisë së Shqipërisë, për dhënien e 500 granatave me gaz lotsjellës për t’i përdorur kundër protestuesve të opozitës në Shqipëri. /Insajderi.com
