Kryeministri i Kosovës, Avdullah Hoti, ka bërë të ditur se sot së bashku me zëvendëskryeministrat kanë diskutuar me ministrin e Arsimit, Ramë Likaj dhe bashkëpunëtorët e tij për fillimin e vitit shkollor 2020/2021.
Siç bën të ditur kryeministri Hoti, ministri Likaj me ekspertët e fushës, si dhe në konsultim me komunat e Kosovës, SBASHK-un, Këshillin e Prindërve dhe akterë të tjerë, është duke finalizuar opsionet për organizimin e mësimit nga data 1 shtator.
Hoti tha se komunat dhe drejtorët e shkollave do të kenë udhëzime të qarta se si duhet të organizohet mësimi varësisht nga kushtet që kanë në shkollat e tyre.
Sipas tij, mësimi online do të jetë gjithmonë aktiv, ndërsa janë duke u zhvilluar protokolle të veprimit se çfarë masa duhet të ndërmerren në çdo situatë që paraqitet.
Po ashtu, do të ndërmerret një fushatë informuese për nxënësit dhe arsimtarët për masat mbrojtëse që duhet të zbatojnë.
Kreu i Qeverisë gjithashtu theksoi se mësimdhënësit janë duke u trajnuar për mësimin online, si dhe po punohet që të kemi listë rezervë të mësimdhënësve që mund të angazhohen sipas nevojës.
Edhe Inspeksioni i arsimit do të jetë në mbështetje të shkollave për t’i udhëzuar për masat që duhet ndërmarrë, por edhe për të mbikëqyrë zbatimin e atyre masave. /Insajderi.com
