Ministri i Tregtisë dhe Industrisë, Vesel Krasniqi, ka kërkuar nga institucionet publike dhe shtetërore të vendit që t’i mbështesin prodhimet vendore, njofton Insajderi.
Këtë kërkesë Krasniqi e ka bërë me anë të një ftese publike të cilën ua ka dërguar institucioneve, ku kërkon që në procedurat e tenderimit ta fusin si kriter prodhimin vendor.
“Konsideroj se institucionet publike të vendit duhet të kenë përgjegjësi morale dhe ligjore që gjatë furnizimeve me prodhime të ndryshme, të cilat prodhohen në vendin tonë, t’u jepet përparësi, me ndonjë kriter të veçantë, në suaza ligjore, gjatë procedurave të organizatave buxhetore”, thuhet në ftesën publike, që ministri ua ka dërguar institucioneve publike të vendit.
Këtë ftesë, ministri Krasniqi e ka bërë pas takimeve të shumta që i ka zhvilluar me përfaqësues të bizneseve, odave ekonomike dhe shoqatave të ndryshme të vendit. /Insajderi.com
