Presidenti i Kosovës, Hashim Thaçi, pritet që gjatë kësaj jave të ftojë liderët e partive politike, për të shikuar mundësinë e krijimit të Qeverisë së re.
Kjo, për shkak që më 25 të këtij muaji Qeveria Kurti, u rrëzua nga një mocion mosbesimi nga partneri qeverisës, Lidhja Demokratike e Kosovës, shkruan Insajderi.
Mirëpo, pavarësisht që njoftimi zyrtar i mocionit nga Kuvendi i Kosovës, ka arritur të premtën në zyrën e presidentit Thaçi, ky i fundit nuk ka arritur të ftojë për sot liderët e subjekteve politike.
Mirëpo, ende pa i dërguar këto ftesa, tashmë kryetari i Lëvizjes Vetëvendosje, Albin Kurti, ka thënë se nuk do të shkojë në konsultime me presidentin, pasi duan zgjedhje, meqë kështu e thotë Kushtetuta e Kosovës.
Ndërsa, në Aleancën për Ardhmërinë e Kosovës, kanë thënë për Insajderin se ende nuk kanë ndonjë ftesë, mirëpo edhe pasi ta marrin këtë nuk do të vendosin asgjë pa u mbledhur Kryesia e partisë.
Deputetja e AAK-së, Time Kadrijaj, ka thënë se Insajderin se nuk ka ndonjë informatë se a kanë marrë ftesë nga presidenti Thaçi, apo jo.
“Nuk kam ndonjë informacion, se a kemi ftesë”, ka thënë ajo.
Sipas saj, i gjithë vendimi varet nga Kryesia e Aleancës për Ardhmërinë e Kosovës.
“Jemi në gjendje pandemie dhe e dimë siç është situata, megjithatë nuk kemi ndonjë lajm, por ftesat janë publike , por AAK-ja paraprakisht i diskuton këto çështje , pra mblidhet Kryesia dhe e diskutojmë”, ka deklaruar Kadrijaj, për Insajderin.
Qeveria e Kosovës në krye me Albin Kurtin u rrëzua të mërkurën e kaluar nga një mocion i mosbesimit i inicuar nga partneri qeverisës, Lidhja Demokratike e Kosovës.
Mocioni u votua me 82 vota për, 32 kundër, dhe 1 abstenim nga 117 deputetë sa ishin të pranishëm në sallë.
Qeveria Kurti u rrëzua në ditën e 50-të të qëndrimit në pushtet.
Shqyrtimi i mocionit të mosbesimit ndaj ekzekutivit ishte kërkuar të shtyhet për shkak të gjendjes së krijuar nga koronavirusi, nga i cili deri më tani në Kosovë janë konfrimuar 71 raste.
Por një gjë e tillë nuk ndodhi.
Qeveria Kurti u miratua me 3 shkurt të këtij viti në Kuvendin e Kosovës, pas më shumë se 100 ditësh negociata LVV-LDK dhe rreth 4 muaj pas zgjedhjeve të parakohshme të 6 tetorit 2019, të cilat të parën e renditën LVV-në, e të dytën LDK-në./Insajderi.com
