Deputeti i Lëvizjes Vetëvendosje, Artan Abrashi, ka thënë se partia e tij nuk mund të jetë përgjegjëse për një projekt që ai thotë është puro i LDK-së – Projektligji për rimëkëmbje ekonomike, njofton Insajderi.
“Sot në rastin më të mirë kjo qeveri ka 47 deputetë. LDK-ja nga 28 ka ra në 26 deputetë. Nuk bëhet shteti kështu. Zgjidhja është të kthehemi te qytetarët”, tha ai në “Debat Plus” në RTV Dukagjini.
Abrashi ka thënë gjithashtu se pandemia është arsyeja kryesore që kjo qeveri duhet të shkarkohet.
“Pandemia është arsyeja kryesore pse kjo qeveri duhet të shkojë një ditë e më parë”.
Deputeti i LVV-së thotë se qytetarët pos mungesës së ndihmës nga shteti po dënohen nga qeveria edhe me masa ndëshkuese.
“Punëtorët e ndërtimtarisë janë duke u ballafaquar me masa shumë të rënda. Për ta qeveria nuk ka menduar për asgjë…Duhet të shtohet numri i inspektorëve të punës që këta punëtorë të mos shkelen”.
Abrashi tutje ka thënë se LVV ka votuar shumë projektligje ndërkombëtare, por thotë se nuk mund të votojnë projekte politike që janë të LDK-së.
“Ju e dini se çfarë raporte ka Vetëvendosje me LDK-në, ne nuk mund të votojmë projekte politike të LDK-së”, tha ndër të tjera Artan Abrashi./Insajderi.com
