Kryetari i Kuvendit të Kosovës, Kadri Veseli, ka thënë se komandanti legjendar Adem Jashari “besonte se ëndrra për liri ishte më e fortë se terrori”.
“Sakrifica e Adem Jasharit dhe Familjes së tij është rast unik në historinë e njerëzimit. Mesazhi i saj u flet shekujve dhe gjithë popujve: Asgjë nuk është më e çmueshme sesa liria”, ka thënë Veseli.
Ai ka thënë se duhet ta pranojmë faktin se jemi në demokraci dhe nuk ka rrugë tjetër të ecjes përpara, përveç rrugës së komunikimit, kompromisit e konsensusit të përbashkët për interesat e vendit dhe të qytetarëve.
“Besoj fuqishëm se nuk ka hendeqe të pakapërcyeshme mes nesh”, ka shtuar Veseli.
“Ne nuk jemi këtu për t’i dëshpëruar qytetarët, por për t’u dhënë atyre shpresë dhe argumente se ky vend është në rrugën e duhur dhe ka të ardhme të sigurt”, ka thënë tutje ai.
“I nderuar dhe i përjetshëm qoftë kujtimi për Adem Jasharin, Familjen e tij dhe gjithë dëshmorët e lirisë”, ka thënë ndër tjera Veseli gjatë fjalimit të tij në Kuvend./Insajderi.com
