E.M., mund të dënohet nga ligji nëse del fajtor për përfshirjen në aksidentin në trafik, ku mbetën të vdekur katër anëtarë të familjes Ramadani, por nga familja e të vdekurve tashmë është falur.
Familja Ramadani në ditën e varrimit të katër të vdekurve, në një ceremoni të faljes, ia ka falur gjaqet familjes Musliu.
Ngjarja ka ndodhur në varrezat e qytetit të Shtimes. Gjithashtu, u njoftua se të pame do të ketë jo vetëm në familjen Ramadani, por edhe në familjen Musliu.
Ndërmjetësues për faljen e gjaqeve kanë qenë kryetarët e komunave, Agim Aliu i Ferizaj dhe Naim Ismajli i Shtimes.
Aksidenti ku mbetën të vdekur katër persona ndodhi të dielën, rreth orës 15:30.
Deri tek aksidenti dyshohet të ketë ardhur, kur automjeti i udhëtarëve Audi me targa vendore, e drejtuar nga E.M. 22-vjeç, po qarkullonte nga drejtimi i Ferizajt drejt Shtimes dhe me të arritur në Koshare, për shkaqe ende të panjohura, kalon në anën tjetër të lëvizjes dhe ndeshet me automjetin VË Golf me targa vendore, i cili po qarkullonte në drejtimin e kundërt.
Si pasojë e aksidentit humbën jetën N.R., 39 vjeçar, drejtues i automjetit, XH.R., 60-vjeçare, S.R. 32-vjeçare dhe Y.R., 12-vjeçar.
I dyshuar për këtë rast është drejtuesi i automjetit Audi, E.M, i cili është ndalur në mbajtje për 48 orë.