Kandidati për kryeministër nga Lëvizja Vetëvendosje, Albin Kurti ka uruar besimtarët myslimanë për festën e Kurban Bajramit.
Kurti, nëpërmes një shkrimi në Facebook, ka përmendur sakrificën si simbol të kësaj feste, e cila, sipas tij, përbën mesazh universal. Kurti po ashtu ka sqaruar mesazhin e kësaj feste.
“Secila festë fetare e sjell një mesazh e një simbolikë universale, por cili është mesazhi i Kurban Bajramit?. Nga historia e Ibrahimit, që gjendet në themel të fesë islame por edhe asaj të krishterë e asaj hebreje, mësojmë se nëse jemi gati vërtet të sakrifikojmë gjënë më të shtrenjtë për qëllimin më të mirë, atëherë edhe do të fitojmë shumë, edhe nuk do të na duhet të sakrifikojmë aq shumë”, ka shkruar Kurti
“Këtë mesazh e përkujton festa myslimane e Kurban Bajramit, tradita e së cilës e lyp që një e treta e kurbanit të konsumohet me familjarët, një e treta të jepet në miqësi e shoqëri, dhe një e treta të shkojë për të varfrit”.
“Kjo simbolikë e sakrificës për ideal, e përkujdesjes për familjen, e besnikërisë për shoqërinë dhe mbi të gjitha e solidaritetit për ata që janë në gjendje të vështirë ekonomike, përbën mesazhin universal të kësaj feste. Me këtë rast i uroj të gjithë besimtarët, gëzuar, qofshi mirë e veprofshi mirë”, ka shkruar Kurti në Facebook./Insajderi.com
