Partia e Ali Ahmetit – Bashkimi Demokratik për Integrim mirëpret urdhrin ekzekutiv të Presidentit të Shteteve të Bashkuara të Amerikës, Joe Biden, që parashikon ngrirjen e pasurive dhe ndalimin e hyrjes në SHBA për të gjithë ata që destabilizojnë Ballkanin Perëndimor, kryejnë korrupsion e minojnë institucionet demokratike, shkruan Insajderi.
Nga BDI thonë se i gëzon fakti që ndër ata që kërcënojnë stabilitetin e Ballkanit Perëndimor janë etiketuar dhe përfshirë edhe personat që punojnë kundër Marrëveshjes së Prespës dhe Marrëveshjes Kornizë të Ohrit, të cilat janë vija të deklaruara botërisht të kuqe.
Bashkimi Demokratik për Integrim plotësisht përkrah vendimin e Shteteve të Bashkuara, përkatësisht përkushtimin e tyre për të nxitur llogaridhënien dhe për të luftuar korrupsionin në Ballkanin Perëndimor dhe në të gjithë botën.
“BDI si një parti përgjegjëse në Maqedoninë e Veriut përshëndet vendimin e Shtëpisë së Bardhë me qëllim garantimin e sigurisë dhe stabilitetit politik në Ballkanin Perëndimor dhe angazhimi i administratës Biden për avancimin e interesave thelbësore në mbrojtjen e institucioneve demokratike do të jetë synim drejt të cilit BDI asnjëherë nuk do të ngurojë së afruari”, thonë nga ky subjekt politik. /Insajderi.com
