Ambasada e Shteteve të Bashkuara të Amerikës në Prishtinë, ka dënuar ashpër ngjarjen e ndodhur gjatë ditës së hënë (26 mars), në veriun e Mitrovicës, ku u arrestua Marko Gjuriq pas hyrjes ilegale brenda territorit të Republikës së Kosovës.
Përmes një komunikate për media, Shtetet e Bashkuara të Amerikës ftojnë të dyja palët që të shmangin përshkallëzimin e mëtutjeshëm të situatës, dhe të zgjidhin problemet në mënyrë paqësore.
“Shtetet e Bashkuara të Amerikës dënojnë fuqishëm ngjarjet e djeshme në Mitrovicë, të cilat panevojshëm ngrejnë tensione dhe kërcënojnë stabilitetin rajonal. I nxisim të gjitha palët që të shmangin përshkallëzimin e mëtejmë të situatës dhe të veprojnë me urtësi dhe të zgjidhin mospajtimet në mënyrë paqësore”.
“Për të krijuar paqe dhe stabilitet të qëndrueshëm në Ballkan, Kosova dhe Serbia duhen të përqendrohen në normalizimin e marrëdhënieve nëpërmjet dialogut të udhëhequr nga BE-ja. Shtetet e Bashkuara janë të gatshme për të mbështetur të gjitha palët në bisedimet e Dialogut”, thuhet në komunikatën e ambasadës.
