Anija ruse është bllokuar qe 20 ditë në Durrës

Anija ruse është bllokuar qe 20 ditë në Durrës

Një anije ruse e ngarkuar me grurë, është bllokuar në portin e Durrësit.

Sipas burimeve, kompania shqiptare ka paguar 500 mijë euro për porosinë që ka bërë tek ndërmjetësi që ka kontaktuar me kompaninë ruse që zotëronte sasinë e grurit që do nisej për Shqipëri. Por, ato para nuk kanë kaluar te kompania që ka dërguar grurin dhe as anijës  nuk i është paguar për transportin e kryer.

Kompaia shqiptare i është drejtuar gjykatës së shkallës së parë në Durrës, për sigurimin e anijes dhe pas vendimit të gjyqësorit anija është bllokuar nga Kapitaneria në port, deri në zgjidhjen e konfliktit mes palëve.

Nuk është ende e qartë pse ndërmjetësi nuk ka shlyer pagesën e bërë nga kompania shqiptare për kompaninë ruse.

Anija “SV.Georgiy Pobedonosets” u nis nga porti Volgodonsk në Rusi më datë 22 gusht dhe mbërriti në Durrës më datë 31 gusht.

Anija me flamur rus qëndron në kalatën portuale që nga fillimi i muajit dhe ekziston rreziku që sasia e grurit të bëhet e papërdorshme, për shkak të qëndrimit për një kohë të gjatë në kushte të papërshtatshme. Tashmë pritet që brenda 5 ditësh të shprehet edhe gjykata e Apelit për këtë çështje dhe situate absurde e krijuar mes palëve të marrë zgjidhje, shkruan laps.al.