Profesori universitar, Armand Krasniqi, ka thënë se Agjencia e Akreditimit të Programeve universitare nuk ka përdorur kritere të ashpra.
Ai ka thënë se asnjë pedagog nuk është ndier mirë me situatën e fundit të krijuar rreth akredimit të këtyre programeve, duke i mbajtur anë Këshillit Shtetëror të Cilësisë.
“Universiteti i Prishtinës bën dallim tepër të madh nga universitetet tjera që fshihen pas UP-së dhe e luajnë rolin e zhurmuesit. UP ka programe shumë cilësore dhe tërheqja e disa programeve nuk është fundi i botës. Problemi është të universitetet tjera publike”, ka pohuar ai në Klan Kosova.
“Sikur të vendoseshin kritere më të larta se që ka vendos tash dhe jam i bindur se mbi 50% e programeve do të ishin mbyllur, së pari mbi kriterin e profilit të pedagogëve.”.
Krasniqi ka thënë se në Universitetin “Haxhi Zeka” në Pejë ka profesor që mbajnë lëndë që kurrë në jetë nuk i kanë dhënë dhe që kurrë në to nuk kanë dhënë një provim.
“Në “Haxhi Zeka” punojnë disa profesor nga shkencat e sigurimeve dhe japin kontabilitet dhe auditim. Është situatë katastrofale. Unë jam i lumtur që jam pjesë e UP –së që nuk e ka bërë asnjëherë këtë gabim. Të cilësia mund të kemi rënie-ngritje por megjithatë duhet të jemi krenar me UP-në. Është diametralisht e kundërt me universitetet tjera”, ka thënë Krasniqi.
