Avokati i Popullit ka reaguar për mosrespektimin e masave anti-COVID nga partitë politike, gjatë fushatës që po mbahet për zgjedhjet nacionale të 14 shkurtit, njofton Insajderi.
Me anë të një reagimi për media, nga ky institucion thuhet se zbatimi i masave kundër COVID-19 është selektive.
Sipas avokatit të popullit, ky është një standard i dyfishtë që nuk mund të tolerohet dhe cenon barazinë e qytetarëve para ligjit.
“Avokati i Popullit shfaq shqetësimin e tij lidhur me zbatimin selektiv të masave të qeverisë për parandalimin e pandemisë COVID-19, gjatë fushatës zgjedhore për Zgjedhjet e Përgjithshme 2021. Avokati i Popullit ka vërejtur se që nga fillimi i fushatës parazgjedhore nuk janë respektuar masat anti -covid nga ana e partive politike ndërsa në anën tjetër institucionet që kanë për obligim t’i zbatojnë këto masa nuk kanë reaguar. Ky është një standard i dyfishtë që nuk mund të tolerohet dhe cenon barazinë e qytetarëve para ligjit. Përveç kësaj, Avokati i Popullit shpreh shqetësimin e tij për rrezikimin e jetëve të qytetarëve për mosrespektim të masave”, thuhet në njoftimin e këtij institucioni.
Në reagimin e Avokatit të Popullit, theksohet obligimi që e kanë të gjitha institucionet dhe partitë politike që të respektojnë masat për parandalimin e pandemisë ndërsa fton autoritetet kompetente që të ndërmarrin veprime konkrete për respektimin e këtyre masave nga subjektet politike. /Insajderi.com
