Ish-ministrja e Arsimit, Hikmete Bajrami, ka akuzuar ministren aktuale, Arbërie Nagavci, se po financon bursa të studentëve për një fakultet në Selanik të Greqisë që sipas saj, nuk është cilësorë, shkruan Insajderi.
Ajo ka thënë së kjo marrëveshje nuk është në interes shtetëror e as në atë të studentëve, e cila ka kërkuar që të anulohet.
“Kjo marrëveshje në interes të kujt ishte, nuk është në interes shtetëror por besoj edhe as në atë të studentëve. I bëjë thirrje kryeministrit që t’i kërkojë raportit ministres së Arsimit, që kjo marrëveshje të rishikohet dhe anulohet menjëherë. Ky është keqpërdorim i buxhetit dhe ka qenë i tillë prej vitit 2009″, ka deklaruar Bajrami.
Kurse Nagavci ka sqaruar se nuk ka të përfshirë punëtorë të ministrisë së Arsimit në konflikt interesi sa i përket ndarjes së bursave.
“Keqpërdorimet në të kaluarën kanë qenë nga stafi i ministrisë që kanë qenë të lidhur ngushtë me politikën dhe kanë përfituar, kësaj radhe nuk kemi lejuar dhe që ndonjë punëtorë do të ketë ndonjë konflikt interesi për të përfituar nga mundësia e shpërndarjes së bursave”, ka pohuar ajo.
Ajo me tej, ka shtuar se kolegji është pjesë e kampusit evropian të universitetit të Jorkut, diplomat lëshohen nga ai.
“ Nëse e shohim për rangimin, atëherë besoj se duhet të shikohet i universitetit që i pranojnë studentët e që është i ranguar i 133-ti. Dhe për më shumë ajo që e përmenda është e rëndësishme që ne kemi përjashtuar nga mundësia e përfitimit çfarëdo personi që mund të ketë konflikt interesi, siç ka ndodhur në të kaluarën”, ka thënë më tej Nagavci./Insajderi.com
