Nënkryetari i Qendrës Kulturore të Kosovës në Paris, Bardhyl Dobra, është emëruar zëvendësministër i Punëve të Brendshme, njofton Insajderi.
“Bardhyl Dobra, i lindur me 17 shkurt 1986 në Drenas, është në përmbyllje të doktoraturës pranë Universitetit Gent në Belgjikë. Tema e doktoraturës është “Administrata publike në shtete post-konflikt: rasti i Kosovës”, thuhet në njoftim nga MPB.
Dobra nga viti 2013 deri në 2020, ka qenë Sekretar ekzekutiv i Asociacionit Ndërkombëtar të Shkollave dhe Instituteve të Administratës, kurse në 2019-2020 ka qenë zyrtar për akreditime pranë Komisionit Ndërkombëtar për Akreditime të programeve të arsimimit dhe trajnimeve në fushën e Administratës Publike.
Në Francë ai ka përfunduar një pjesë të shkollës fillore, shkollën e mesme dhe studimet bachelor dhe master në ekonomi. Ku gjatë kësaj periudhe ai ka qenë pjesë e programeve të shkëmbimit me të cilat ka studiuar një semestër në Britani të Madhe dhe një vit në Shtetet e Bashkuara të Amerikës.
“Pas rikthimit në Francë, Bardhyli ka vazhduar me një master tjetër në shkenca politike dhe si rrjedhojë ka bërë përvojën profesionale të masterit pranë Ambasadës së Francës në Kosovë”, thuhet në njoftim.
“Bardhyli ka qenë i angazhuar në shoqata studentore në Francë dhe ka qenë deri më tani nënkryetar i Qendrës Kulturore të Kosovës në Paris, si dhe anëtar i Bordit të Global Albanian Foundation. Përveç gjuhës shqipe, Bardhyli flet edhe gjuhën frënge dhe atë angleze”, thuhet tutje në njoftim. /Insajderi.com
